Ang gaganaping pagpupugay sa watawat sa Malacañang Grounds, Malacanang sa darating na Agosto 2, 2010 ang magsisilbing hudyat ng pormal na pagbubukas ng pagdiriwang ng Buwan ng Wikang Pambansa sa taong ito na ang paksang-diwa ng pagdiriwang ay: Sa Pangagalaga ng Wika at Kalikasan, Wagas na Pagmamahal Talagang Kailangan

Pangungunahan ng Komisyon sa Wikang Filipino sa pamamagitan ng nangangasiwang Sangay ng Impormasyon at Publikasyon ang maikling programa sa araw na iyon na inaasahang dadaluhan ng panauhing pandangal, Pangulong Benigno ‘Noynoy’ Aquino III at ilang opisyal ng Malacañang.

Ang mensahe at pagpapakilala sa panauhing pandangal ay gagampanan ng matikas na punong komisyoner ng Komisyon sa Wikang Filipino, G. Jose Laderas Santos.

Ang ikalawang bahagi ng programa ay ang Talakayang Pangwika na idaraos sa Social Hall, 4/F Mabini Bldg., Malacañang. May nakalaang dalawang oras at kalahati para sa naturang talakayan

Para sa Talakayang Panel pag-uusapan ang sumusunod: Pagpapalakas ng Wika sa Talakayang Pangkalikasan; Iba Pang Wika ng Pilipinas – Kahalagahan sa Talakayan sa Pagbabagong Pangkalikasan; at Wika: Mahalaga sa Kasalukuyang mga Pagbabago sa Pamahalaan.

Pagkakalooban ng Sertipiko ng Pagdalo at Paglahok ang mga magsisidalo at makikilahok sa naturang talakayan.

Sa Agosto 31, sa Philippine Columbian Association, Plaza Ishikawa, Paco, Maynila idaraos ang “Araw ng Gawad 2010” na siyang pampinid na palatuntunan ng pagdiriwang ng Buwan ng Wikang Pambansa.

Tampok na bahagi ng palatuntunan ang pagpaparangal at pagkakaloob ng gantimpalang salapi, tropeo at/o plake sa mga magwawagi sa timpalak sa GAWAD SURIAN SA SANAYSAY na taunang itinataguyod ng Komisyon sa Wikang Filipino. Ang tema ng timpalak sa taong ito ay ‘Sa Pangangalaga ng Wika at Kalikasan, Wagas na Pagmamahal Talagang Kailangan’ Ang deadline ng timpalak ay sa Agosto 6, 2010.

 Kaalinsabay din nito ang pagkakaloob ng GAWAD DANGAL NG WIKANG FILIPINO sa mga namumukod-tanging mga indibiduwal at institusyon na di-matatawaran ang ambag ng mga ito sa kani-kanilang larangan sa pagpapaunlad, pagpapalaganap at pagtatampok sa wikang Filipino.

Ito ang ang paksa ng timpalak sa Gawad Surian sa Sanaysay 2010 na taunang itinataguyod ng Komisyon sa Wikang Filipino kaugnay ng pagdiriwang ng Buwan ng Wikang Pambansa. Bukas na ang timpalak at inaanyayahan ang lahat na lumahok. Ang deadline ay sa Agosto 6, 2010. i-click para sa TUNTUNIN at PORMULARYO